Американскиот претседател Доналд Трамп изјави за „Њујорк пост“ дека верува оти војната во Иран наскоро ќе заврши и дека други земји можат сами да го отворат Ормускиот теснец, кој Иран го држи блокиран веќе 31 ден, што предизвика раст на цените на енергенсите.
Трамп објави и снимка од експлозии кај Исфахан и рече: „Нема да бидеме таму уште долго. Во моментов ги разнесуваме, тоа е целосно уништување. Но нема да мораме да останеме уште долго. Имаме уште работа додека не ја уништиме нивната офанзива.“
Претседателот истакна дека другите држави можат да го решат прашањето со теснецот: „Мојот став е следен: Јас ја уништив таа земја. Тие веќе немаат сила. Нека земјите што го користат теснецот сега одат и го отворат.“
Трамп ги критикуваше и американските сојузници што не се понудиле да учествуваат во мултинационална флота за отворање на пловниот пат. За новинарско прашање дали ќе ја заврши војната без отворање на теснецот, тој рече: „Искрено, не размислувам за тоа. Мојата единствена задача беше да се осигурам дека нема да имаат нуклеарно оружје. И нема да го имаат. Кога ќе заминеме, теснецот автоматски ќе се отвори.“
За воздушните напади кај Исфахан, Трамп не откри детали, но истакна дека бил изненаден од големината на експлозијата, што укажува на значајна цел. „Сè ќе се дознае, но тоа беше само уште едно од нивните прекрасни подрачја за кои се погриживме“, рече претседателот.
Трамп тврди дека со операциите се отстранети нуклеарните способности на Иран и дека постигнал промена на режимот: „Сега имаме работа со сосема поинаква гарнитура луѓе, и тие се многу поразумни од претходниците.“
И покрај тоа што најави брз крај на конфликтот, Трамп остави сите опции отворени и распореди илјадници американски војници во регионот за можни копнени операции, меѓу кои амфибиски јуришни групи на маринци и падобрански единици од копнената војска.
