Ужас на аеромитингот во Радом, Полска, откако борбен авион Ф-16 на полските воздухопловни сили се урна за време на пробна демонстрација, при што пилотот загина. Инцидентот се случи околу 17:30 часот по Гринич, а авионот се урнал директно на пистата, предизвикувајќи оштетувања на инфраструктурата.
Воздухопловната претстава, која беше закажана за викендот, веднаш е откажана по несреќата. Застрашувачки снимки од моментот на падот на авионот се проширија на социјалните мрежи, предизвикувајќи големо внимание и загриженост кај јавноста.
Портпаролот на полската влада, Адам Шлапка, преку социјалните мрежи ја потврди смртта на пилотот, но не даде дополнителни детали за причините за несреќата. Министерот за одбрана веќе се упатил кон местото на инцидентот за да го надгледа истражувањето и понатамошните мерки.
Сè уште не се познати точните причини за падот на авионот, а властите најавија дека детална истрага ќе биде спроведена за да се утврдат сите околности на трагичниот инцидент.