Конфликтот меѓу Иран, САД и Израел влезе во 25-тиот ден, а тензиите на Блискиот Исток не покажуваат знаци на смирување. Иако американскиот претседател Доналд Трамп првично упати остри закани кон Иран поради ситуацијата во Ормускиот теснец, вчера го промени ставот и нагласи дека преговорите се движат во позитивна насока. Од Техеран тоа се негира, тврдејќи дека Трамп „се уплашил по предупредувањата“. Според неофицијални извори, САД го одредиле 9 април како можен датум за завршување на конфликтот. Пазарите на нафта повторно реагираа со раст на цените, а некои земји од Персискиот залив размислуваат за директно вклучување во воени дејствија.
Дипломатски пресврт: Иран подготвен за разговори
Според информациите на Al Arabija, ирaнскиот министер за надворешни работи Абас Аракчи тајно информирал дека врховниот лидер на Иран, Моџтаба Хамнеи, дал зелено светло за разговори и потенцијален договор со САД. Во Иран постојат поделби меѓу тврдите линии и проруски настроените дипломати, а овој чекор ја засилува „преговарачката“ фракција.
И покрај тоа, американските официјални лица се скептични дека Иран ќе прифати услови кои го ограничуваат неговиот нуклеарен и балистички програм. Неуспешните преговори од 28 февруари и почетокот на американско-израелски операции против Техеран ја намалуваат веројатноста за успешен договор, пренесува Ројтерс.
Реакција на Европа и нападите во регионот
Емануел Макрон за денес свикал состанок на Советот за национална одбрана и безбедност за да ја разгледа ситуацијата во Иран и поширокиот Блиски Исток, пренесува BFM TV.
Израелски воздушни сили извршиле повеќе воздушни удари во Либан, погодувајќи и стамбени објекти и мостови, додека најмалку шест лица се повредени во новиот ракетен напад на Тел Авив од страна на Корпусот на Исламската револуционерна гарда, кој изврши серија прецизни удари врз американски и израелски цели.
Урсула фон дер Лајен повика на итни преговори меѓу САД и Иран за да се реши кризата во Ормускиот теснец и да се спречи понатамошно влошување на ситуацијата.
Напнатост на морските патишта и пазарите
Во Ормускиот теснец се пронајдени десетина подводни мини за кои се верува дека ги поставил Иран, додека американската администрација ја повикува Техеран да овозможи слободен поморски сообраќај. Поради ова, цената на суровата нафта Brent повторно ја надмина границата од 100 долари по барел.
Можен крај на конфликтот и геополитички импликации
Неименуван израелски официјален претставник изјавил дека Вашингтон го одредил 9 април како целен датум за завршување на војната, оставајќи околу 21 ден за продолжување на борбите и преговорите.
Володимир Зеленски изјави дека украинската воена разузнавачка служба располага со „необориви“ докази дека Русија продолжува да им доставува разузнавачки податоци на Иран, што дополнително ја комплицира ситуацијата во регионот.
