Конфликтот меѓу САД, Израел и Иран влегува во втората недела, додека американската војска испраќа дополнителни 2.200 маринци и три амфибиски воени бродови кон регионот. Групата предводена од USS Tripoli (LHA-7), заедно со USS San Diego (LPD-22) и USS New Orleans (LPD-18), ќе биде поддржана со околу 20 борбени авиони F-35B Lightning II. Силите пристигнуваат од Јапонија, каде се стационирани во базите Сасебо и Окинава, но американските власти нагласуваат дека тоа не значи моментална копнена интервенција.
Во меѓувреме, Израел соопшти дека ноќта во Техеран погодил припадници на паравоената формација Басиж, на контролни пунктови во главниот град на Иран. Израелската војска наведува дека нападите се дел од стратегија за уништување на иранските воени структури и оперативци.
Конфликтот веќе ја потресе економијата: цените на нафтата се искачија до околу 102 долари за барел, поттикнати од стравувањата за продолжување на нападите. И покрај привременото олеснување на санкциите за руската нафта од страна на Вашингтон, пазарот останува нестабилен.
Ирански дронови пак го погодиле финансиското јадро на Дубаи (DIFC), предизвикувајќи материјална штета и нарушувајќи го деловното функционирање, додека компании беа принудени да преминат на работа од дома.
Дипломатските обиди за смирување на тензиите засега не даваат резултати, а регионот се наоѓа на работ на уште поголема ескалација.
