Израелски воздушен напад ја потресе јеменската престолнина Сана, каде што, според локални и израелски медиуми, загина премиерот на хутската влада Ахмед ал-Рахави заедно со повеќе високи функционери. Иако Тел Авив сè уште официјално не потврдил, информациите велат дека ова е еден од најтешките удари врз групата поддржана од Иран.
Нападот бил насочен кон станбена зграда во која се наоѓал ал-Рахави со неговите најблиски соработници. Истовремено, изведен бил уште еден воздушен удар врз локација надвор од Сана, каде се собрале министри од хутската влада за да го следат говорот на лидерот Абдул Малик ал-Хути. Меѓу погодените се наоѓале и министерот за одбрана Мухамад Насер ал-Атафи, како и шефот на војската на хутите.
Израелската телевизија „Канал 13“ повикувајќи се на извори тврди дека „целата владина и воена елита на хутите е елиминирана“.
Ахмед ал-Рахави стана премиер на хутската влада во август минатата година, додека ал-Атафи важеше за највисокиот воен функционер на групата уште од 2016 година. Овој удар би можел драматично да ја промени рамнотежата на моќта во Јемен и регионот.
