Марија Ковалчук, 20-годишна девојка која во март беше пронајдена во критична состојба покрај автопат во Дубаи, конечно реши да ја раскаже целата вистина за шокантниот инцидент што ја стави во инвалидска количка. Нејзината исповед го потресе регионот – и ја отвори повторно темата за темната страна на „луксузните забави“ во Дубаи.
Во интервју со руската новинарка Ксенија Собчак, Марија опиша хорор сценарио во кое, според неа, била жртва на насилство од страна на деца на богати бизнисмени од Русија и Украина. Таа раскажа дека денес се наоѓа во Норвешка каде се обидува повторно да прооди – откако поминала низ кома и операција на повеќе скршени коски, меѓу кои и ’рбетот.
Сѐ започнало кога Марија го испуштила својот лет за Тајланд бидејќи се успала. Додека се одјавувала од хотелот во Дубаи, случајно налетала на познаник што претходно го сретнала во бар. Тој ѝ понудил утеха, па дури и патување до Тајланд со неговиот приватен авион, на што таа прифатила бидејќи му верувала.
Кога отишле во хотелската соба, таму биле уште тројца – маж и две жени, пријатели на нејзиниот познаник. Во првите часови, атмосферата била нормална – разговарале за патувањето, а Марија дури и ѝ се јавила на мајка ѝ за да ѝ каже дека сè е во ред. Но, следниот ден ситуацијата драстично се променила.
Мажите почнале да пијат силен алкохол и да се однесуваат агресивно. Ја задевале зошто не пие со нив, а потоа почнале да ѝ зборуваат дека таа „припаѓа на нив“ и дека можат да ѝ прават што сакаат. На шега или не – таа веќе чувствувала страв. Тensionот во собата растел – кршеле шишиња, а на крајот ѝ ги одзеле и личните предмети, вклучувајќи го и пасошот.
Тогаш Марија почувствувала вистинска опасност и се обидела да избега. Во еден момент, додека тие биле на балконот, таа ја искористила можноста и избегала од хотелот. Се скрила на блиско градилиште, надевајќи се дека ќе биде безбедна. Но, за жал, нејзините прогонители ја нашле и таму.
„Кога ги видов дека доаѓаат, само трчав до првата зграда. Се скрив таму, зградата уште се градеше“, раскажува Марија. Во следните моменти се случил нападот – ја изгубила свеста, а следното нешто што го памети е како облечена во хотелска бањарка, повикува помош од случаен возач на автопатот.
Поради ударите, не може со сигурност да каже дали ја удирале до повреда или ја фрлиле од висина – иако самата мисли дека второто е можно. Нејзината состојба била критична – со скршени раце, нозе и повреди на ’рбетот.
Она што дополнително шокира е фактот дека снимките од надзорните камери во хотелот биле избришани. Мажите кои се осомничени за нападот биле приведени, но наскоро пуштени. Според Марија и нејзината мајка, болничките трошоци биле покриени од властите во Дубаи – наводно за да се „спушти прашината“ околу случајот и да се заштитат влијателните семејства.
„Сега тврдат дека сакале да ми помогнат, дека самата сум сакала да бидам дел од забавата“, вели Марија со горчина.
Истрагата сѐ уште е во тек, но засега нема нови притвори. И покрај сè, Марија не се откажува. Лекарите ѝ дале надеж дека со време и рехабилитација, ќе може повторно да застане на нозе.
