Од 1 јануари 2026 година граѓаните на Скопје, Тетово и Куманово, како и возачите што ќе се движат по коридорите „8“ и „10“, ќе бидат првите кои ќе се соочат со имплементацијата на новиот проект „Безбеден град, безбедна држава“. Ова е најавата што денеска ја изнесе министерот за внатрешни работи Панче Тошковски на средбата во Охрид со словенечкиот министер за внатрешни работи, Боштјан Поклукар.
Министерот информираше дека измените во законот за безбедност во сообраќајот и патиштата, во кои се вградени одредбите за овој проект, вчера го поминале првото читање во Собранието пред матичната комисија. Тој нагласи дека суштината на законот не е казнување на граѓаните со цел полнење на буџетот, туку исклучиво заштита на човечките животи.
„Целта на овој систем не е да се полни буџетот на Република Македонија, туку да се спаси барем еден човечки живот“, истакна Тошковски, потсетувајќи дека во 2024 година животот го загубиле 142 лица во сообраќајни несреќи предизвикани од непочитување на правилата.
Проектот се очекува до средината на 2026 година да ја покрие целата територија на државата. Преку современи технолошки решенија и интегриран надзор ќе се обезбеди построга контрола на сообраќајот, што според властите ќе доведе до намалување на трагичните исходи на патиштата.
Тошковски дополнително најави дека контроли ќе има и понатаму, но со многу построги санкции. Во рамките на Кривичниот законик, покрај парични казни, ќе се изрекуваат и затворски казни, а возилата со кои се сторени кривични дела ќе се одземаат трајно.
Со вакви мерки, Министерството за внатрешни работи очекува дека Македонија ќе направи голем чекор напред кон побезбедни улици и спасени човечки животи.
