Александар Николоски објави дека Меѓународниот аеродром Скопје останува лидер во регионот со импресивен раст од 32 проценти во однос на истиот период лани. Овој резултат, како што посочува, е потврден и од меѓународни извори, што дополнително ја зацврстува позицијата на Македонија на авио-мапата.
И покрај одредени предизвици, како што е влијанието на конфликтите на Блискиот Исток, кои довеле до намалување од околу 6.000 седишта од вкупно планираните 390.000, македонските аеродроми и понатаму остануваат високо рангирани во регионот.
Во првите месеци од годината, бројот на патници пораснал за околу 30 проценти, додека бројот на авио-операции е зголемен за 20 проценти. Овие податоци укажуваат на силен тренд на раст и успешност на политиките за развој на авиосообраќајот.
Паралелно со тоа, воведени се нови авиолинии – од Скопје кон Неапол и Будимпешта, како и од Аеродром Св. Апостол Павле кон Милано и Братислава. Во текот на летниот период се очекува дополнително проширување со линии кон Катовице и Вроцлав од Охрид, како и кон Палермо и Алгеро од Скопје.
Во изминатите речиси две години, воспоставени се вкупно 24 нови авиолинии, што претставува рекорден број и значаен чекор кон подобра поврзаност со европските дестинации.
Истовремено, се реализира и проект за реконструкција и проширување на охридскиот аеродром, со цел зголемување на капацитетот за патници и операции, што ќе овозможи уште поголем развој на авиосообраќајот.
Според проценките, до крајот на годинава бројот на патници може да надмине 3,5 милиони, а веќе следната година да достигне и до 4 милиони – бројки кои досега не биле забележани.
Во однос на состојбата со горивата, надлежните уверуваат дека ситуацијата е стабилна и дека авиосообраќајот се одвива без прекини.
