Вистински трилер се одвивал ноќеска и утрово во зграда за социјално загрозени лица во Улицата „Вишесава Бугариновиќ“ во Севојно. Она што започнало како бизарно заклучување во стан, завршило со тешки повреди и пад од височина, оставајќи ги соседите во шок и неверување.
Драмата започнала половина час по полноќ кога пожарникарите биле итно повикани на интервенција бидејќи четири машки лица останале заробени во стан. Ситуацијата станала тензична кога мажите одбиле пожарникарите да ја разбијат вратата, иаko не можеле да излезат бидејќи некој од нив го скршил клучот во бравата. Еден од нив, 46-годишен маж, инсистирал да биде спасен преку тераса, по што пожарникарите со скали и јажиња го спуштиле на безбедно, додека останатите тројца тврдоглаво одбиле да го напуштат станот.
Сепак, најстрашниот дел од настанот се случил утрово. Под сè уште неразјаснети околности, 31-годишен маж, кој бил дел од групата во станот, скокнал од терасата на вториот кат. Со тешки телесни повреди, тој бил итно транспортиран во Општата болница во Ужице, каде лекарите се борат за неговиот живот. Полицијата и пожарникарите на крајот морале насилно да ја отворат вратата за да извршат увид, а за целиот случај се известени обвинителството и Центарот за социјална работа, кои треба да откријат што навистина се случувало зад затворените врати во текот на оваа пеколна ноќ.
