По две интензивни години на светска турнеја, славниот пејач Џастин Тимберлејк реши да ја отвори душата и да сподели нешто што долго го чувал далеку од очите на јавноста. Во искрен пост на Инстаграм, тој соопшти дека боледува од Лајмска болест – состојба која му го сменила животот и го ставила на сериозен физички и ментален тест.
„Јас сум затворен тип, не зборувам често за себе, но чувствувам дека е време да бидам искрен“, напиша Тимберлејк. Открил дека симптомите – болки во нервите, хроничен замор и изнемоштеност – почнале да се појавуваат за време на настапите, а вистинскиот шок дошол кога ја добил дијагнозата.
Сепак, наместо да се повлече, тој одлучил да ја продолжи турнејата, водејќи се од љубовта кон музиката и публиката. „Настапите ми донесоа радост што беше посилна од болката што ја чувствуваше моето тело“, изјави тој. Тимберлејк признал дека долго се двоумел дали да ја објави својата здравствена состојба, но на крајот одлучил да биде транспарентен, за да не биде погрешно сфатен од јавноста.
„Животот понекогаш е немилосрден. Но, ако со ова можам да помогнам на некој друг што се соочува со истото – вреди“, напиша тој, повикувајќи на поголема свесност и поддршка за лицата што се борат со Лајмска болест.
Лајмската болест, предизвикана од бактерија што се пренесува преку заразени крлежи, може да предизвика сериозни здравствени компликации ако не се третира навреме. Таа најчесто се појавува во одредени делови на САД, но е присутна и во Европа и Канада. Во јавноста за оваа болест веќе отворено зборуваа и други ѕвезди, како Бела Хадид.
Исповедта на Тимберлејк отвора прашање што често се игнорира: колку навистина ги познаваме битките што јавните личности ги водат далеку од сцената? Овој пат, еден од најголемите поп-ѕвезди реши да не молчи – и токму затоа неговите зборови одекнуваат толку силно.
