Припадници на Министерството за внатрешни работи, Одделот за сузбивање организиран општ криминал, Службата за борба против организиран криминал, УКП, во соработка со Јавното обвинителство за организиран криминал во Белград, во организирана акција реализирана на територијата на Пожаревац, Смедерево, Рума, Велика Плана и Белград, уапсија 16 лица поради постоење основи на сомнение дека извршиле повеќе кривични дела – здружување за вршење кривични дела, измама и прикривање.
Уапсените се: Б. М. (62), за кого била распишана Интерполовска меѓународна потерница, и И. К. (62), организатори на криминалната група, како и Б. Ф. (63), Д. С. Г. (47), Б. Ф. (54), М. З. (44), Ф. П. (28), М. Г. (35), М. М. (59), Г. Г. (58), Н. А. (21), Н. Т. (43), С. П. (44), Т. М. (60), В. П. (57) и В. Ж. (27), додека за уште две лица интензивно се трага.
Се сомничи дека тие, како организирана криминална група, со цел стекнување противправна имотна корист, од почетокот на 2024 година до денес, увезувале во Србија патнички возила од висок клас и најнова продукција, кои претходно ги прибавиле извршувајќи кривични дела на територијата на земјите од ЕУ. Возилата потоа ги носеле на однапред одредена локација во Србија, каде вршеле демонтирање на т.н. „GPS уреди“ со цел прикривање на траекторијата на движење и оневозможување на пронаоѓање на возилата од легитимните сопственици и полицијата.
Се сомничи дека Б. М. и И. К. ангажирале лица кои по нивна наредба оделе во земјите на ЕУ, пред сè во Германија и Австрија, каде во различни агенции за изнајмување возила, користејќи свои или фалсификувани документи, изнајмувале возила од различни марки и модели, чија вредност надминува еден милион и петстотини илјади динари, доведувајќи ги сопствениците во заблуда дека ќе ги вратат возилата.
Потоа, како што се сомничи, ангажирале возачи да ги донесат возилата во Србија, каде однапред ги организирале за криење, по што во договор со трети лица ги продавале по значително пониска цена од пазарната вредност и така прибавиле противправна имотна корист за себе и другите членови на организираната криминална група.
На осомничените им е определено задржување до 48 часа, по што, заедно со кривична пријава, ќе бидат приведени пред надлежното обвинителство.
