Неверојатни сцени пристигнуваат од Грција, каде што силна бура предизвика поплави, лизгање на земјиштето и свлечишта.
Силни јужни ветрови и високи бранови го подигнаа нивото на морето, кое на некои места се излеа на брегот и ги поплави крајбрежните населби. Особено погодени се Паралија, Олимпик Бич, делови од Халкидики, како и Солун.
Црвена тревога е издадена за Пелопонез, Западна Грција, Јонските острови и Епир поради продолжувањето на бурата.
Солун под вода
Невообичаен пораст на нивото на морето беше забележан во Каламарија, каде што водата одеднаш ги покри крајбрежните патишта, пабовите и паркинзите. Некои автомобили беа полупотопени, а сообраќајот беше прекинат на неколку места.
Голема штета на Халкидики
Во Никити, крајбрежниот дел од градот беше сериозно оштетен. Морето го турна шеталиштето и патот, носејќи песок, камења и тиња. На некои локации имаше ерозија на брегот, оштетување на патиштата и тротоарите, а пороите предизвикаа големи количини материјал на патиштата и лизгања на земјиштето.
Екипите се на терен и работат на чистење и санирање на штетите за да се нормализира сообраќајот. Плажите целосно го променија својот изглед, а бројни куќи и инфраструктурни објекти се оштетени или уништени. Локалните угостители и туристички работници апелираат да се забрзаат активностите пред Велигден и почетокот на летната сезона.
Ветер до 120 км/ч
На Крит и во близина на островот Икарија, ветерот достигна брзина до 120 км/ч. Во планинските региони беа регистрирани обилни поројни дождови, кои го оштетија патиштата, а во крајбрежните градови како Катерини, Кавала и делови од Атина, морето навлезе во урбаните средини.
Метеоролозите предупредуваат дека почвата е презаситена со вода, па дури и умерени врнежи од дожд можат да предизвикаат нови лизгања и поплави. Оваа зима е историски дождлива, а проблемот е метеоролошки, геолошки и хидролошки.
Силен циклон од Јадранското Море, во комбинација со низок воздушен притисок, доведе до зголемување на нивото на Егејското Море, предизвикувајќи крајбрежни поплави и големи материјални штети.
