Сите вработени во Министерство за внатрешни работи на Бугарија, вклучително и кадетите, ќе бидат подложени на задолжително тестирање за дрога, според нов правилник објавен за јавна расправа.
Тестирањето ќе се спроведува по наредба на министерот, генералниот секретар или раководителите на структурите, но и при конкретни сомнежи – како видливи знаци на однесување, по предлог на претпоставен или за време на ненадејни инспекции. Дополнително, вакви проверки ќе се вршат и во рамки на дисциплински постапки поврзани со злоупотреба на наркотични супстанции.
Предвидено е формирање постојана комисија составена од претставници на повеќе служби – внатрешна безбедност, инспекторат, правни служби, човечки ресурси и психологија – која ќе го следи спроведувањето на мерката.
Финансиски, тестирањето ќе се покрива со прераспределба на постојниот буџет, без дополнителни трошоци за државата. Цените се прецизно утврдени – околу 5.160 евра за уред како Dräger DrugTest 5000, додека поединечните тестови се движат од 18 до 30 евра, а лабораториските анализи достигнуваат и до 300 евра.
Ова е втор обид за воведување ваква регулатива, откако претходната од 2022 година беше поништена од Врховен управен суд на Бугарија поради недоволна финансиска и резултатска анализа.
Контроверзиите околу тестовите остануваат – синдикатите предупредуваат дека тие се премногу чувствителни и можат да дадат лажно позитивни резултати, дури и по употреба на легални лекови или енергетски пијалоци. Истите уреди се користат и при контрола на возачи, што во минатото доведе до случаи на одземање дозволи и возила додека се чекаат лабораториски потврди.
И покрај тоа, властите се решени повторно да ја протуркаат мерката, нагласувајќи ја потребата од повисок степен на контрола и дисциплина во полициските редови.
