Кралот Чарлс III објави лично видео-обраќање во кое се потсети на животот и наследството на својата „драга мајка“, покојната Елизабета II, по повод 100 години од нејзиното раѓање. Веста ја пренесе BBC.
Видеото било снимено во Балморал и во него кралот зборува за живот исполнет со служба, нагласувајќи дека неговата мајка останала посветена на јавноста до самиот крај. Тој се присети на нејзината стабилност во време на големи светски промени и истакна дека таа била постојана фигура на мир и должност.
Во своето обраќање, Чарлс III посочи дека денешниот свет веројатно би ја загрижил Елизабета II, без да навлегува во конкретни примери, но нагласувајќи дека таа секогаш верувала во подобра иднина и во силата на добрината.
По повод стогодишнината од нејзиното раѓање, е најавено и откривање на нов споменик во нејзина чест. Бронзената статуа, изработена од скулпторот Мартин Џенингс, ќе ја прикажува кралицата во нејзините помлади години, облечена во свечена облека од Редот на Гартер, и ќе биде поставена во Сент Џејмс Парк.
Проектот, дизајниран од тим предводен од познатиот архитект Норман Фостер, вклучува и дополнителни елементи – биста на кралицата во подоцнежни години, статуа на Принц Филип, како и реконструкција на мостот во паркот со стаклени елементи инспирирани од кралска тијара.
Покрај физичките споменици, ќе биде создаден и дигитален меморијал, каде граѓаните ќе можат да споделуваат свои сеќавања за Елизабета II. Планирана е и нова фондација што ќе поддржува локални заедници низ проекти инспирирани од нејзината работа и вредности.
Во пораката, Чарлс III ја истакна и нејзината верба дека мирот, правдата и безбедноста се темел на секое општество, додавајќи дека многумина ја паметат по нејзината насмевка, љубезност и едноставни, но човечки моменти, меѓу кои и познатата сцена со „сендвич со мармалад“ и Падингтон Мечето.
