Нови податоци од организацијата Internet Watch Foundation откриваат загрижувачки тренд на интернетот – за само една година речиси двојно се зголемил бројот на комерцијални веб-страници кои продаваат материјали поврзани со сексуална злоупотреба на деца.
Според годишниот извештај, во 2025 година биле идентификувани 15.031 ваква страница, додека една година претходно бројката изнесувала 7.028. Овој нагол скок укажува на сериозно проширување на мрежи кои профитираат од најтешки облици на онлајн криминал.
Во рамки на истата анализа, организацијата дигитално означила 317.101 фотографии, со цел тие да бидат препознаени и блокирани од технолошките компании, со што се ограничува нивното понатамошно ширење на интернет.
Особено загрижувачки е податокот дека околу 16 проценти од идентификуваните страници – односно 2.458 – биле намерно маскирани за да изгледаат како легитимни или неактивни веб-страници, додека всушност криеле начини за пристап до незаконска содржина.
Од организацијата се нагласува дека криминалните мрежи сè повеќе користат финансиски системи за профитирање од ваквите содржини, поради што се упатува повик до финансиските институции да воведат обврска за откривање и пријавување сомнителни дигитални трансакции поврзани со ваков тип криминал.
Извршната директорка на организацијата, Кери Смит, предупредува дека се работи за индустрија која системски се развива и ја искористува ранливоста на системите. Таа нагласува дека е неопходно да се нарушат сите канали преку кои криминалците остваруваат профит.
Дополнително, извештајот покажува и раст на т.н. „секстрорзија“ – онлајн уцени со компромитирачки материјали. Во 2025 година биле регистрирани 397 случаи, речиси двојно повеќе од 175 случаи во 2024 година, што укажува на зголемена изложеност на младите на вакви ризици.
Организации како NSPCC предупредуваат дека жртвите не само што се изложени на злоупотреба, туку често се соочуваат и со дополнителна психолошка траума поради континуираното ширење на материјалите онлајн.
Во меѓувреме, британските власти најавуваат построги законски мерки. Надлежните истакнуваат дека лицата кои управуваат или модерираат вакви веб-страници ќе се соочат со најстроги казни, додека регулаторите и технолошките компании ќе имаат зголемени обврски за откривање и спречување на злоупотребата.
Севкупно, податоците укажуваат на брза еволуција на онлајн криминалот поврзан со експлоатација на деца и засилен притисок врз институциите да реагираат побрзо и поефикасно во дигиталниот простор.
