Лондон – Русија ја интензивира кампањата на сајбер напади против Велика Британија, нејзините сојузници во НАТО и Украина, како дел од дигиталната војна за компензација на неуспесите на бојното поле, предупредува извештај на британскиот тинк-тенк „Хенри Џексон Сосајети“.
Според извештајот, Велика Британија станала „примарна цел“ на хакерските групи поврзани со Кремљ. Нападите се насочени кон клучни инфраструктури, владини системи и цивилни мрежи, при што експертите забележуваат опасен јаз помеѓу современото хибридно војување и традиционалниот пристап на НАТО кон колективната одбрана.
Групата „Sandworm“ е обвинета за саботажа на енергетски и комуникациски мрежи во Европа, додека во Украина хакерските напади предизвикуваат нарушувања во електричните мрежи и апликациите за воздушни предупредувања, особено во студените зимски денови, со цел зголемување на страдањето на цивилите.
Бројот на напади врз Велика Британија драматично се зголемил – од 7 во 2022 година на 27 само во јануари 2023 година. Некои од најголемите скокови се предизвикани од политички одлуки, како најавата за испорака на ракети „Storm Shadow“ на Украина, што доведе до деветкратно зголемување на нападите за еден месец. Дури и официјалната реторика го зголемила ризикот, откако владин портпарол јавно ја нарече Русија „ривал“.
Авторите предупредуваат дека Кремљ користи сајбер операции за притисок, без директно предизвикување на НАТО, и дека ваквите тактики ќе продолжат додека војната во Украина трае. Велика Британија и сојузниците се повикуваат итно да ја зајакнат сајбер одбраната и стратегијата за одвраќање, бидејќи „една промена на лозинка“ не е доволна за спротивставување на дигиталната агресија на Кремљ.
