Иранската државна новинска агенција Фарс објави видео во кое тврди дека прикажува подземни тунели на Револуционерната гарда, каде се складира оружје поврзано со нападите врз американски бази во регионот. На снимката се гледаат редици беспилотни летала распоредени во долг подземен коридор, како и делови што личат на ракетни лансирни позиции.
Во кадрите се забележуваат ирански државни симболи и фотографии од покојниот врховен лидер Али Хамнеи, додека видеото прикажува и сцени на лансирање ракети и дронови од повеќе локации кон цели кои Фарс ги опишува како „американски бази“.
Објавата доаѓа по неодамнешните американско-израелски удари врз Иран и е претставена како демонстрација на капацитетите што, според Техеран, и натаму се оперативни и достапни. Воедно, во видеото нема прецизни податоци за датумот и местото на снимање, ниту пак е наведено дали прикажаното оружје е директно поврзано со конкретните најнови напади или се работи за архивски/промотивни кадри.
Снимката во јавноста предизвика нови шпекулации за тоа дали Иран со оваа демонстрација најавува продолжување на операциите и нови удари, или целта е да се испрати порака за подготвеност и континуитет на одбранбените и офанзивните капацитети.
