Јавно достапното видео објавено од украинскиот Центар за регрутирање странски борци при Министерството за одбрана во април 2023 година прикажува човек по име Пинто, кој тврди дека работел како приватен обезбедувач во Бразил и дека лесно се приспособил на украинската армија. Но, полицијата во Рио де Жанеиро има поинаква верзија: Пинто не бил обичен чувар, туку локален водач на озлогласената криминална организација Командо Вермељо — „Црвената команда“, една од најопасните нарко-банди во Јужна Америка.
Истражување на „Киев Индепендент“ и сведоштва од бразилски борци во Украина откриваат дека човек со богато криминално досие успеал да влезе во украинските редови, да се движи меѓу различни единици и да остане таму иако неговото однесување будело сомнежи кај командантите.
Бразилската полиција тврди: Не дошол да се бори – дошол да учи тактики
Полициските служби во Рио сметаат дека вистинската цел на Пинто била да стекне воена обука што бандата би ја користела против полицијата во Бразил. Тие го поврзуваат со водач на Црвената команда во Салгеиро — едно од најнасилните жаришта во Рио. Според инспекторите, постојат снимки, патни податоци и докази за најмалку три негови влегувања во Европа, како и видео каде Пинто во униформа му оддава почит на нарко-босот, велејќи дека „секогаш ќе бидат негови војници“.
Украинските војници го пријавиле поради сомнителни врски
Неколку бразилски доброволци кои служеле во Украина анонимно изјавиле дека Пинто често разговарал преку видео-повик со вооружени членови на бандата во Бразил и им раскажувал борбени ситуации. Извештаите укажуваат дека служел во повеќе украински единици — меѓу нив и Меѓународната легија — од каде бил отстранет поради сомнително однесување.
Потоа, наводно, преминал во територијална одбрана. Засега не е јасно каде се наоѓа во моментов.
Пред Пинто нема црвено барање – Украина немала основ да го одбие
Украинските власти потврдија дека не постоела меѓународна потерница за него, поради што формално немало пречка да биде примен. Но воени извори појаснуваат дека со години постојат сомневања дека јужноамерикански картели се обидуваат да се инфилтрираат во украинските сили со цел да научат тактики со беспилотни летала, експлозиви и урбано војување.
Нови кривични постапки – Бразил подготвува обвиненија
Бразилската полиција најавува нови обвиненија против Пинто, врз основа на неговите престои во Украина, снимките и комуникациите со членови на нарко-организацијата.
Во октомври во Рио беше изведена најкрвавата рација против нарко-бандите во историјата на градот, со повеќе од 100 загинати. За време на нападите, Црвената команда користела беспилотни летала со експлозиви — техника што исто така ја користат украинските сили на фронтот.
Бразилски војници: „Ние не сакаме криминалци меѓу нас“
Еден од бразилските доброволци во Украина изјавил дека е горд што бразилските борци го пријавиле Пинто и додал:
„Ние тука се бориме за Украина, не сакаме криминалци меѓу нас.“
Видео:
