Технолошки потрес во светот на вештачката интелигенција – Meta официјално најави дека од 15 јануари 2026 година, WhatsApp ќе забрани користење на AI чат-ботови од трети страни, како што се ChatGPT, Perplexity, Luzia и Poke. Новата политика беше објавена на 18 октомври и претставува дел од најновото ажурирање на WhatsApp API, со кое Meta целосно ќе го зацврсти својот монопол во AI комуникацијата.
Компанијата веќе активно ги интегрира своите Meta AI функции во WhatsApp, Facebook и Instagram, при што корисниците немаат можност да ги исклучат. Новиот потег е дел од стратегијата на Meta да го задржи целиот AI екосистем под своја контрола, елиминирајќи ги независните развивачи кои нудеа алтернативи за разговор со вештачка интелигенција.
Дополнително, Meta потврди дека разговорите со Meta AI ќе се користат за прикажување персонализирани реклами на своите платформи – одлука што веќе предизвика жестоки реакции меѓу експертите за приватност, кои предупредуваат дека ова претставува уште подлабоко нарушување на приватноста на корисниците.
Сепак, правилата нема целосно да го блокираат користењето на вештачката интелигенција во апликацијата. Забраната ќе важи само за чат-ботови со општа намена, како ChatGPT и сличните генеративни AI системи. Компаниите што користат AI за корисничка поддршка, следење нарачки или техничка помош ќе можат да продолжат да ги користат своите автоматизирани системи.
Со оваа одлука, Meta испраќа јасна порака – сите разговори со вештачка интелигенција во WhatsApp ќе бидат исклучиво под контрола на Meta AI. Тоа значи дека од следната година, корисниците нема да можат да разговараат со ChatGPT преку WhatsApp, а сите апликации и услуги што ја нудеа оваа можност ќе мора да престанат со работа.
Овој потег предизвика голема дебата во технолошките кругови – дали Meta со ова ја штити својата платформа или го ограничува развојот на отворената AI конкуренција? Едно е сигурно – ерата на ChatGPT во WhatsApp завршува на 15 јануари 2026 година.
Не дознавај последен - читај ПРВ.мк
