Министерството за внатрешни работи спроведува обемна полициска акција на повеќе локации во земјава, поврзана со сомневања за складирање и трговија со опојни дроги. Активностите се реализираат во координација со Обвинителството за гонење на организиран криминал и корупција, а официјални информации се најавени по нивното целосно завршување.
Според неофицијални сознанија, попладнево засилени полициски сили влегле во кругот на поранешниот индустриски комплекс ОХИС во Скопје. На терен биле забележани повеќе комбиња, камиони и службени возила, а акцијата, како што се наведува, е насочена кон објекти во кои се сместени фирми поврзани со истрагата, меѓу кои и компанијата „Алфафарм“.
Паралелно, претреси и истражни дејствија се спроведуваат и на локации во Струмица, што укажува на поширока мрежа на активности поврзани со случајот. Акцијата следи по заплената на пет тони марихуана во Србија, која тамошните власти ја оценија како најголема во историјата на земјата.
Премиерот Христијан Мицкоски во телевизиско гостување изјави дека станува збор за сериозен предмет и најави дека во наредните денови се очекуваат уште поголеми заплени на територијата на Северна Македонија. Според него, истрагата опфаќа незаконско складирање и пуштање во промет на дрога, како и сомнителни деловни релации меѓу правни субјекти во земјава и во странство.
Македонското обвинителство веќе отвори предмет за случајот, додека српските институции проценија дека вредноста на запленетата марихуана достигнува и до десет милиони евра.
