Вчера попладне, во речиси непристапната месност Алтн Врв, под Царев Врв на Осоговските Планини, на висина од 2000 метри, шумочуварите од подружницата Осогово – Крива Паланка при Национални Шуми, открија шокантен обид за подметнување голем шумски пожар.
Во дел кој речиси и да не се посетува од луѓе, биле пронајдени над триесет автомобилски гуми, вклучително и внатрешни гуми, картон за потпалување, како и сува борова дрвна маса и гранки, сѐ внимателно подготвено за палење. Состојбата укажува на сериозна намера за предизвикување пожар на отворен простор, кој – доколку не бил навремено спречен – многу лесно можел да се прошири во блиската шума и да предизвика разорна еколошка катастрофа.
Информацијата ја потврди директорот на Дирекцијата за заштита и спасување, Стојанче Ангелов, кој уште еднаш испрати силен апел до граѓаните.
„Ако забележите нешто сомнително – како гуми, дрвени палети, картон, шишиња или туби со течност што наликува на бензин – веднаш јавете се на бројот 112, најблиската полициска станица или до припадник на полицијата или безбедносните служби,“ порача Ангелов.
Секој навремен повик може да значи спасена шума, животи и природни ресурси. Да останеме будни и одговорни!
