Градоначалникот на Скопје, Орце Ѓорѓиевски, денеска во градската администрација одржа официјална работна средба со амбасадорот на Европската Унија, Н.Е. Михалис Рокас, како и со првиот советник и раководител на Секторот за економски прашања во Делегацијата на ЕУ, Марија Канелопулу.
Ова е првата официјална средба помеѓу градоначалникот и претставниците на ЕУ по неговото стапување на функцијата, а фокусот бил ставен на продлабочување на европските партнерства и дефинирање на идни заеднички иницијативи.
Во разговорите биле опфатени урбанистички и економски теми, со посебен акцент на развој на модерни инфраструктурни решенија, одржлив транспорт, дигитализација и подобрување на јавните услуги.
Ѓорѓиевски изјави дека ваквиот тип на комуникација е од исклучителна важност за Скопје, бидејќи отвора можности за проекти, инвестиции и размена на добри практики директно од европските институции.
Тој додаде дека очекува интензивирање на соработката и верува дека преку заеднички активности Скопје ќе продолжи да се развива како современ, функционален и европски град, во согласност со очекувањата на граѓаните.
