Правилното складирање на храната е клучно доколку сакате да ја задржите свежината, вкусот и хранливите вредности. Но, иако пластичните садови се најчести и најпрактични во домаќинствата, експертите предупредуваат дека тие не се секогаш најдобар избор. Одредени видови храна не треба да се чуваат во пластика, бидејќи тоа може да доведе до губење на квалитетот, но и до потенцијална опасност по здравјето.
Нутриционистката Ники Кулман за „EatingWell“ објаснува дека некои пластични амбалажи испуштаат хемиски соединенија кога доаѓаат во контакт со висока температура или киселина, а тие супстанции можат да ја нарушат хормоналната рамнотежа и да создадат долгорочни здравствени последици.
Топла храна
Пластичната амбалажа е практична, но загревањето на пластиката може да доведе до ослободување на штетни хемикалии како BPA и фталати, кои можат да завршат директно во храната.
„Овие соединенија влијаат на хормоналната функција и затоа не препорачувам топла храна да се чува или загрева во пластика“, вели Кулман.
Таа советува користење на садови од стакло или не’рѓосувачки челик, додека пластиката може да биде соодветна само за ладни намирници како салати или сендвичи.
Фини сирења
Чедар, моцарела или крем сирењето можат да стојат во пластика, но фините зрели сирења бараат поинакви услови.
Пластиката го стопира протокот на воздух и создава влага, поради што сирењето ја губи текстурата, го менува вкусот и може да добие непријатен мирис.
Најдобро е да ги завиткате во газа или хартија за печење, а потоа да ги ставите во кеса што не се затвора целосно.
Сосови од домати и друга кисела храна
Доматниот сос, лимоновиот сок и другите кисели производи можат да реагираат со пластиката и да ја оштетат.
„Јас речиси никогаш не складирам кисела храна во пластика“, изјавува научничката д-р Меган Мејер.
Стакло или метал се многу побезбедна опција, бидејќи не реагираат со киселините и не испуштаат хемиски соединенија.
Кромид и лук
Овие намирници не треба да се чуваат во пластични кеси бидејќи влагата предизвикува побрзо расипување и ‘ртење.
Најдобро е да се чуваат во хартиени или мрежести кеси, на ладно, суво и темно место.
Лиснат зеленчук
По отворање, пластичните кеси не се најдобро решение за чување зелена салата, спанаќ или кељ.
Наместо тоа, завиткајте ги во чиста кујнска крпа или хартија, па ставете ги во затворен сад. Пешкирот ја апсорбира влагата и спречува венење.
Свежи билки
Магдонос, коријандер, босилек и други свежи билки многу побрзо се расипуваат во пластична кеса.
Најдобро е да ги третирате како свежи цвеќиња – да ги потсечете, да ги ставите во чаша или тегла со вода и да ги покриете лабаво со кеса. На овој начин можат да останат свежи и до две недели
