Полицијата пријави четири случаи на семејно насилство во последните два дена, при што лица од различни возрасти биле лишени од слобода.
На 26 март во 00:15 часот, на подрачјето на Центар, Скопје, К.П.(38) е приведен поради физички напад врз неговата 53-годишна партнерка. Според пријавата, жртвата претходно била психички и физички малтретирана.
Ден претходно, на 25 март во 23:10 часот на Аеродром, Ц.М.(26) бил лишен од слобода поради физички напад врз својот 66-годишен татко и уништување на дел од покуќнината. И во овој случај постоела претходна историја на психичко вознемирување.
Истата вечер, во 18:50 часот во Драчево, Б.Д.(43) е приведен поради напад врз 37-годишната партнерка, при што фрлил и остар предмет, кој не ја погодил жртвата.
Во Гостивар, на 25 март во 23:30 часот, А.Ј.(44) е приведена поради физички напад врз нејзината 67-годишна мајка.
Дополнително, во Неготино, полицијата извршила службен разговор со 60-годишник кој се заканувал на својата 59-годишна сопруга, а за случајот бил известен јавен обвинител и Центарот за социјални работи.
Полицијата продолжува со преземање мерки за расчистување на сите случаи, а по целосно документирање ќе следат соодветни пријави против сторителите.
