Полицијата го уапси П. С., последниот од тројцата осомничени за нападот врз куќата на Здравко Чолиќ во Дедиње на 3 февруари. Со него се комплетира групата што го извршила бомбашкиот напад.
Според истрагата, Сенад М. (32) и П. С. фрлиле рачна граната врз вилата, додека Марко А. им помогнал со набавка на експлозивните направи. На сослушувањата пред обвинителот, Сенад М. го искористил правото да не се брани, додека Марко А. кратко негирал и одбил да одговори на прашањата.
Експлозијата ја вознемирила целата населба – оштетени биле фасадата и паркираните возила, алармите на автомобили се активирале, а делови од гранатата летале десетици метри. Младата ќерка на Чолиќ била во куќата во време кога пејачот бил во Загреб.
Безбедносните камери ја забележале акцијата – двајца непознати мажи ја фрлиле гранатата точно во 5 часот наутро. Истрагата продолжува, додека јавноста останува во шок од бруталноста на нападот врз познатиот пејач.
