На железничката станица Монпарнас во Париз денеска владеела вистинска паника кога маж вооружен со нож почнал агресивно да мавта и да се заканува дека ќе ја убие својата поранешна сопруга. Настанот се случил во најфреквентниот дел од станицата, каде што стотици патници биле затекнати во моментот на инцидентот, што довело до хаотично бегство и силен страв меѓу присутните.
Полицијата веднаш реагирала и се обидела да го приведе напаѓачот, но тој одбил да се предаде и продолжил да мавта со ножот. Според официјалните информации, мажот бил веќе евидентиран како лице поврзано со семејно насилство, што дополнително ја засилило реакцијата на безбедносните служби. Кога полицајците се доближиле до него, тој почнал да се заканува и да се самоповредува со оружјето што го држел.
Како што пренесува париското обвинителство, едниот полицаец бил принуден да употреби огнено оружје за да го запре и неутрализира заканувачот. По пукањето, напаѓачот бил сериозно повреден, а и покрај интервенцијата на медицинските служби на лице место, засега не се објавени информации за неговата здравствена состојба.
Во паниката што настанала бил повреден и случаен минувач кој се здобил со полесни повреди. Тој веднаш бил пренесен и згрижен од медицинските екипи.
Полицијата ја евакуирала станицата и инцидентот моментално се третира како изолиран, без индикации за терористичка поврзаност. Истрагата продолжува во насока на утврдување на мотивите и можните претходни закани што мажот ги упатувал.
